سليم وليلى الجزء الثاني الفصل العشرين

### الـفـصـل الـعـشـريـن ### ليلة اختفاء يوسف بعد ما والدة سليم وقعت على الأرض... سليم نسي كل حاجة حواليه. الصورة القديمة كانت لسه في إيده، وعينيه بتتنقل بينها وبين أمه الملقاة على الأرض. "أمي!" جرى ناحيتها وركع جنبها، حط إيده على وشها وهو بيحاول يفوقها. "أمي، ردي عليا!" ليلى نزلت بسرعة على ركبتها الناحية التانية، وحطت إيدها على نبضها. ليلى بقلق: "سليم، نبضها موجود، بس لازم نطلب الإسعاف فورًا." سليم طلع موبايله بإيد بتترعش، واتصل بالإسعاف، وبعدها رفع عينه ناحية المكان اللي كان واقف فيه عادل. لكن عادل اختفى. اختفى من غير ما حد يسمع صوته، أو حتى يلاحظ إمتى خرج. سليم قام ببطء، وعينيه مليانة غضب. "عادل..." ليلى رفعت وشها له. "سليم، مش وقته. خلينا نطمن على مامتك الأول." بصلها، وحاول يسيطر على نفسه، لكنه كان حاسس إن كل حاجة في حياته بتنهار قدامه. أخوه اللي كان فاكره مات، طلع عايش. أبوه اللي عاش سنين مقتنع إنه مات بعد الحادثة، طلع مقتول. والشخص اللي كان بيثق فيه طول عمره، جابر، بقى اسمه مرتبط بسر مش قادر يفهمه. أما أمه... فكانت عارفة كل حاجة. أو على الأقل، كانت عارفة أكتر بكتير مما قالت. سليم بص للصورة اللي في إيده مرة تانية. صورة ليه وهو طفل، واقف جنب يوسف وأبوهم. والرجل الغامض واقف وراهم، لابس الخاتم نفسه اللي شافه قبل كده. لكن مين الراجل ده؟ وليه الرسالة بتقول له يسأل أمه عن ليلة اختفاء يوسف؟ بعد دقائق، وصلت سيارة الإسعاف. نقلوا والدة سليم للمستشفى، وسليم وليلى ركبوا وراها. طول الطريق، سليم كان ساكت. إيده ماسكة الصورة بقوة لدرجة إن أطرافها بدأت تتني. ليلى قربت منه. "سليم..." ما ردش. مسكت إيده. "بصلي." رفع عينه ليها أخيرًا. ليلى بحنان: "أنا عارفة إنك موجوع، وعارفة إنك حاسس إن كل الناس خذلتك، بس متخليش غضبك يخليك تتصرف من غير ما تفكر." سليم ضحك بمرارة. "أفكر في إيه يا ليلى؟ في إن أمي كانت مخبية عني أخويا طول السنين دي؟ ولا في إن عادل كان عارف مكانه وسايبني أعيش وأنا فاكر إنه اختفى للأبد؟" ليلى: "إحنا لسه منعرفش كل الحقيقة." سليم بص للصورة. "أنا بقيت خايف أعرفها." ليلى اتفاجئت من اعترافه. سليم كمل بصوت مكسور: "تخيلي يا ليلى... طول عمري فاكر إن أكتر حاجة وجعتني في حياتي هي الحادثة. كنت بصحى كل ليلة على صوت الفرامل، وعلى صرخة يوسف، وعلى النار اللي كانت في العربية." بلع ريقه بصعوبة. "كنت فاكر إني فقدت أخويا يومها، وإن جابر هو اللي أنقذني، وإن أبوي مات بعد كده من الحزن والتعب." بص لها وعينيه بدأت تلمع. "طلع كل اللي كنت فاكره كدبة." ليلى ضغطت على إيده. "مش كل حاجة كانت كدبة يا سليم. حبك لأخوك حقيقي، ووجعك حقيقي، والسنين اللي عشتها مش هتتمسح لمجرد إنك اكتشفت سر." سليم فضل باصص لها. وبعدين سألها فجأة: "لو اكتشفت إن حد من الناس اللي بنحبهم كان سبب في كل اللي حصل... هتقدري تسامحيه؟" ليلى سكتت لحظة. "على حسب عمل إيه." سليم: "ولو كان عمل كده عشان يحميك؟" ليلى: "الحماية مش معناها إنك تحرمني من حقي في الحقيقة يا سليم." الجملة دخلت قلبه. لأنها كانت نفس الإجابة اللي كان بيدور عليها من ساعة ما أمه قالت له إنهم كانوا بيحمُوه. في المستشفى... دخلوا والدة سليم غرفة الفحص، وفضل سليم واقف قدام الباب، بيروح وييجي في نفس المكان. بعد شوية، خرج الطبيب. سليم جري ناحيته. "طمني يا دكتور." الطبيب: "الحمد لله، حالتها مستقرة. واضح إنها اتعرضت لانفعال شديد، وده سبب الإغماء. محتاجة ترتاح، والأفضل نقلل عنها أي ضغط عصبي." سليم هز رأسه. "أقدر أشوفها؟" الطبيب: "بعد ما تفوق، تقدر تدخل." مشي الطبيب، وليلى قربت من سليم. "الحمد لله." سليم ما ردش، لكنه لأول مرة من بداية الليلة حس إنه قادر ياخد نفس. بعد حوالي نصف ساعة، الممرضة خرجت وقالت إن والدته فاقت. دخل سليم لوحده في البداية. كانت أمه مستلقية على السرير، وشها شاحب وعينيها مرهقتين. أول ما شافته، لفت وشها الناحية التانية. سليم وقف عند طرف السرير. "لسه هتخبي وشك مني؟" والدته أغمضت عينيها. "سليم، أرجوك..." "أرجوكي إنتِ!" صوته خرج عالي، لكنه سرعان ما خفضه لما افتكر كلام الطبيب. قرب منها، وقعد على الكرسي جنب السرير. "أنا مش جاي أزعقلك. أنا جاي أفهم." أمه بصت له أخيرًا. سليم طلع الصورة من جيبه وحطها قدامها. "مين الراجل ده؟" بمجرد ما شافت الصورة، وشها اتغير. إيديها بدأت ترتعش، ونَفَسها بقى متقطع. سليم لاحظ. "تعرفيه؟" والدته فضلت ساكتة. "أمي، الراجل ده مين؟" همست بصوت ضعيف: "إنت لقيت الصورة دي فين؟" سليم: "مش مهم لقيتها فين. المهم إنه كان موجود في حياتنا من زمان، وإنه لابس نفس الخاتم اللي ظهر في الصورة اللي عندي." والدته حطت إيدها على فمها. "يا نهار أسود..." سليم مال ناحيتها. "إنتِ تعرفيه!" والدته: "كنت أتمنى إن الصورة دي تكون ضاعت للأبد." سليم: "ليه؟" والدته دمعت. "لأنها الدليل الوحيد اللي فضل على اللي حصل في الليلة دي." سليم اتجمد. "ليلة اختفاء يوسف؟" هزت رأسها ببطء. سليم: "احكيلي." والدته سكتت شوية، وبعدها بدأت تتكلم بصوت مليان وجع. "الليلة دي يا سليم، أبوك رجع البيت متأخر. كان متوتر جدًا، وطلب مني أجهز شنطتين ليك إنت ويوسف." سليم: "شنطتين؟ ليه؟" والدته: "قال إننا لازم نسافر يومين، وإن في مشكلة كبيرة حصلت في الشغل." سليم: "وإنتِ وافقتي؟" والدته: "كنت خايفة، لكن ماكنتش أعرف حقيقة اللي بيحصل. أبوك كان طول الوقت بيقولي إن كل حاجة تحت السيطرة." سليم قبض إيده. "وبعدين؟" والدته: "يوسف كان صاحي. سمع أبوك وهو بيتكلم في التليفون مع حد، ولما أبوك خرج من الأوضة، يوسف دخل وسألني عن الراجل اللي كان بيكلمه." سليم: "كان سمع إيه؟" والدته: "سمعه بيقول إن الورق لازم يختفي قبل الصبح، وإن محدش لازم يعرف إنهم اكتشفوا الحقيقة." سليم قرب أكتر. "أي ورق؟" والدته هزت رأسها. "معرفش. والله ما أعرف. كل اللي أعرفه إن يوسف كان مصمم يعرف أبوك بيتكلم عن إيه." سليم: "وبعدين؟" والدته مسحت دموعها. "بعد نص الليل، جرس الباب رن. أبوك فتح، ودخل الراجل اللي في الصورة." سليم بص للصورة. "دخل بيتنا؟" والدته: "أيوه. وكان بيتكلم مع أبوك بعصبية. سمعتهم بيتخانقوا، وسمعت الراجل بيقوله إنه مش هيسمح له يخرج من الاتفاق." سليم: "اتفاق إيه؟" والدته: "أبوك قال له إنه مش هيسكت عن اللي شافه، وإنه هيسلم كل المستندات للشرطة." سليم حس ببرودة تسري في جسمه. "يعني أبويا كان بيحاول يفضحهم؟" والدته: "أيوه." سليم: "ويوسف سمع الكلام ده؟" والدته أومأت. "يوسف كان واقف ورا الباب. ولما الراجل خرج، دخل على أبوه وقال له إنه عايز يعرف كل حاجة." سليم: "وأبويا قال له إيه؟" والدته بدأت تبكي من جديد. "قال له إن في ناس خطر، وإنه لازم ينسى اللي سمعه. لكن يوسف رفض. قال له إنه مش هيسيب حد يأذينا." سليم نزل عينه. كان فاكر أخوه مجرد طفل عنيد، بيحب يدخل في كل حاجة. لكن الحقيقة إن يوسف كان بيحاول يحمي عيلته، وهو لسه صغير. سليم بص لأمه. "طب الحادثة حصلت إزاي؟" والدته أخدت نفسًا طويلًا. "تاني يوم، أبوك أخدك إنت ويوسف وخرج. قال لي إنه هيرجع قبل المغرب. لكنه ما رجعش." صوتها اتكسر. "بعد ساعات، جالي اتصال من المستشفى. قالوا لي إن العربية عملت حادثة، وإن أبوك في حالة خطيرة." سليم: "وجابر؟" والدته رفعت عينيها. "جابر وصل المستشفى قبلي." سليم اتوتر. "إزاي؟" والدته: "قال إنه كان قريب من مكان الحادثة، وإنه شاف العربية وهي بتتحرك عن الطريق. هو اللي خرجك منها." سليم: "ويوسف؟" والدته سكتت. سليم قرب منها، وعينيه اتملت بالرعب. "أمي... يوسف كان فين؟" والدته: "لما وصلت، قالوا لي إن يوسف اتنقل لمكان تاني قبل وصول الإسعاف." سليم: "مين قال كده؟" والدته: "جابر." سليم وقف فجأة. "جابر قال لك إن يوسف اتنقل؟!" والدته هزت رأسها. "قال لي إنه شاف ناس خدوه، وإنه حاول يلحقهم، لكنه ما قدرش." سليم حط إيده على رأسه. "وإنتِ صدقتيه؟" والدته بصت له بوجع. "كنت منهارة يا سليم. إنت كنت بين الحياة والموت، وأبوك في العناية المركزة، ويوسف اختفى. وبعد أيام، جابر قال لي إن في ناس هددوه، وإن لو فتحت بقي أو سألت عن يوسف، مش هتشوفك تاني." سليم رجع بص لها. "يعني جابر هو اللي قال لك تسكتي؟" والدته: "أيوه." سليم فضل ساكت ثواني. وبعدين سألها السؤال اللي كان بيخاف يسمع إجابته: "أمي... هو جابر كان بيحميني فعلًا؟ ولا كان بيحميني منهم عشان محدش يكتشف إنه واحد منهم؟" والدته ما ردتش. لكن دموعها نزلت أكتر. وسكوتها كان كفاية يخلي الشك يدخل قلبه بقوة. في اللحظة دي، الباب اتفتح بهدوء. ليلى دخلت، لكن أول ما شافت وش سليم، عرفت إن الكلام اللي سمعه غيّر حاجة جواه. ليلى: "سليم؟" بصلها، وبعدها رجع بص لأمه. "لسه في سؤال أخير." والدته همست: "اسأل." سليم: "ليه يوسف اختفى بعد الحادثة بسنين، مش وقتها؟" أمه اتجمدت. ليلى بصت لها بتركيز. سليم كمل: "إنتِ قلتي إن يوسف عاش، وإنه هرب. لكن أنا فاكر إني شوفته بعد الحادثة." والدته رفعت عينيها ببطء. "إنت فاكر؟" سليم: "مش فاكر كل حاجة. بس فاكر إن في ليلة، وأنا لسه بتعالج، حد دخل أوضتي. كنت تعبان ومش قادر أفتح عيني كويس. سمعت صوته بيناديني." والدته غطت وشها بإيديها. سليم: "كان يوسف، صح؟" والدته فضلت ساكتة. سليم هز رأسه، وكأنه بدأ يربط الأحداث ببعضها. "هو جه يشوفني، وبعدها اختفى." والدته قالت بصوت مرتعش: "يوسف كان بيحاول يرجع لك." سليم قرب منها. "يعني إنتِ كنتِ عارفة إنه عايش طول السنين دي؟" والدته: "مش من البداية." سليم: "إمتى عرفتي؟" والدته سكتت طويلًا، وبعدها قالت: "بعد وفاة أبوك." سليم: "إزاي؟" والدته: "في يوم العزا، وصلت لي رسالة من رقم مجهول. كان مكتوب فيها إن يوسف عايش، وإنه مش هيقدر يرجع البيت غير لما يلاقي الدليل اللي يثبت مين ق/تل أبوه." سليم: "والدليل ده إيه؟" والدته: "ماعرفش." سليم: "كدب! أكيد تعرفي!" والدته صرخت وهي بتعيط: "والله ما أعرف يا سليم! كل اللي أعرفه إن يوسف اتصل بيا بعدها بكام يوم، وقال لي إنه قريب من الحقيقة، وإنه لو رجع البيت قبل ما يخلص اللي بدأه، كلنا هنكون في خطر." سليم: "وليه ما قلتيليش؟" والدته: "لأنه طلب مني ما أقولكش." سليم: "وأنا أخوه! كان من حقي أعرف!" والدته: "كان خايف عليك!" سليم ضحك بوجع. "كلهم خايفين عليا! كلهم بيحموني! وفي الآخر أنا آخر واحد يعرف أي حاجة عن حياته!" ليلى قربت منه ومسكت إيده. "سليم، كفاية دلوقتي. مامتك تعبانة." سليم بص لأمه، وملامحه اتغيرت من الغضب للوجع. "أنا مش عارف أزعل منك ولا أخاف عليكي." والدته مدت إيدها ناحيته. "سليم، أنا أمك. صدقني، عمري ما تمنيت لك غير الخير." سليم مسك إيدها، لكنه ما قدرش يرد. لأنه لأول مرة، ما بقاش عارف إذا كان يقدر يثق في أي حد. في مكان بعيد عن المستشفى... كان عادل واقف في جراج مظلم، قدام عربية سوداء زجاجها معتم. طلع موبايله واتصل برقم محفوظ باسم واحد فقط: «يوسف» الرنين استمر طويلًا. محدش رد. عادل حاول مرة تانية. ولا إجابة. ضرب بإيده على سقف العربية، وقال بعصبية: "رد يا يوسف... رد!" وفجأة، سمع صوت خطوات وراه. لف بسرعة. رجل طويل خرج من بين العربيات، لابس جاكيت أسود، ووشه مش واضح. الرجل: "بتحاول توصله؟" عادل بص له بحدة. "إنت عملت فيه إيه؟" الرجل ضحك بهدوء. "لسه فاكر إنك تقدر تنقذه؟" عادل قرب منه. "لو يوسف جراله حاجة، مش هسيبك." الرجل: "إنت مش في موقف يسمح لك تهددني يا دكتور." عادل قبض إيده. "أنا مش هسكت أكتر من كده." الرجل وقف قدامه مباشرة، ورفع إيده ببطء. الخاتم ظهر تحت ضوء المصباح. نفس الخاتم. نفس العلامة اللي كانت موجودة في الصورة القديمة. الرجل قال ببرود: "إنت سكتّ سنين، وهتفضل ساكت. لأن لو سليم عرف إنت كنت بتعمل إيه ليلة الحادثة، مش يوسف بس اللي هتخسره." عادل وشه شحب. الرجل قرب من ودنه وهمس: "هتخسر ليلى كمان." عادل رفع عينه له بصدمة. "إنت مالكش دعوة بليلى." الرجل ضحك. "كل اللي في حياة سليم بقى له علاقة بيا." وبعدين مد له ظرفًا أسود. "وصّل ده لسليم." عادل ما مدش إيده. "إيه اللي جواه؟" الرجل: "الحقيقة اللي كان بيدور عليها." عادل: "وليه مش بتديهاله بنفسك؟" الرجل ابتسم ابتسامة باردة. "لأن الحقيقة ساعات بتق/تل صاحبها... وأنا عايز سليم يكتشفها بنفسه." حط الظرف على سقف العربية، وبدأ يمشي. لكن قبل ما يختفي في الظلام، وقف وقال: "وخلي بالك يا عادل... سليم مش لازم يعرف إنك كنت آخر واحد شاف يوسف قبل اختفائه." عادل اتجمد. الرجل كمل طريقه، واختفى. وعادل فضل واقف مكانه، عينيه ثابتة على الظرف الأسود. بعد ثوانٍ، فتحه. أول ما شاف الورقة اللي جواه، إيده بدأت ترتعش. كان مكتوب فيها: «اللي أنقذ سليم من الحادثة... هو نفسه اللي سلّم يوسف لقاتل أبوه.» عادل رجع خطوة، وهمس برعب: "يا نهار أسود..." في المستشفى... سليم كان واقف عند الشباك، وليلى جنبه، لما موبايله اهتز. رسالة جديدة من رقم مجهول. فتحها. وكان مكتوب: "لو عايز أخوك يرجع لك، تعالى الساعة اتناشر بالليل للمخزن القديم عند الطريق القديم. المرة دي، هتعرف الحقيقة كاملة." وتحت الرسالة، صورة ليوسف. كان قاعد على كرسي، إيديه مربوطتين، ووشه عليه آثار تعب واضحة. لكن عينيه كانت مفتوحة، وباصص مباشرة للكاميرا. سليم حس إن قلبه اتقبض. ليلى حطت إيدها على بُقه بصدمة. "يا رب... يوسف!" سليم كبّر الصورة، وركز في الخلفية. كان فيه حائط قديم، وعلى الحائط ساعة متوقفة. وعلى الأرض، ظهر جزء من ورقة عليها رقم مكتوب بخط واضح. ٢٧. سليم همس: "الرقم ده..." ليلى: "تعرفه؟" سليم رجع للصورة القديمة اللي كانت في جيبه، وقارن بين الصورتين. وبعدين بص لها بصدمة. "ده رقم المخزن اللي أبويا كان بيستخدمه زمان." ليلى: "يعني المكان ده تابع لأبو سليم؟" سليم هز رأسه. "أيوه... بس المخزن ده اتقفل بعد وفاة أبويا، والمفتاح الوحيد كان مع جابر." ليلى سكتت لحظة، ثم قالت: "يبقى جابر يعرف المكان." سليم رفع عينه لها. "مش بس يعرفه يا ليلى." قرب الصورة من عينه، ولاحظ تفصيلة صغيرة في معصم يوسف. ساعة قديمة، كانت بتاعة أبوهم. الساعة اللي سليم فاكر إنه شافها في إيد جابر بعد الحادثة. سليم صوته اتغير. "الساعة دي كانت مع أبويا يوم الحادثة." ليلى: "يعني إيه؟" سليم: "يعني جابر كان عنده حاجة تخص أبويا... حاجة المفروض تكون فضلت معاه." ليلى: "ممكن يكون أخدها عشان يحتفظ بيها." سليم هز رأسه. "وممكن يكون أخدها من المكان اللي حصلت فيه الج/ريمة." سكت لحظة، وبعدين اتصل بجابر. الرنين الأول. الثاني. الثالث. جابر رد أخيرًا. "أيوه يا سليم." سليم حاول يخلي صوته طبيعي. "إنت فين يا جابر؟" جابر: "في البيت. مالك؟ صوتك مش عاجبني." سليم: "عايز أسألك سؤال." جابر: "اتفضل يا ابني." سليم بص لليلى، ثم قال: "فاكر ساعة أبويا القديمة؟" صمت الطرف التاني. ثانية. ثانيتين. وبعدين جابر رد: "أيوه... مالها؟" سليم: "كانت معاك بعد الحادثة؟" جابر: "أيوه. أنا احتفظت بيها." سليم: "ليه؟" جابر: "عشان كانت آخر حاجة فاضلة من ريحته." سليم غمض عينيه. "طيب، فاكر المخزن رقم سبعة وعشرين؟" الصمت رجع من جديد. لكن المرة دي كان أطول. سليم فتح عينيه ببطء. "جابر؟" صوت جابر خرج متوترًا: "إنت عرفت المكان ده منين؟" سليم قبض على الموبايل بقوة. "يعني إنت تعرفه." جابر: "سليم، اسمعني كويس. مهما حصل، ما تروحش هناك." سليم: "ليه؟" جابر: "لأن المكان ده مش آمن." سليم: "يوسف هناك؟" جابر ما ردش. سليم صرخ: "يوسف هناك يا جابر؟!" جابر قال بصوت مكسور: "أنا كنت عارف إنه عايش." سليم اتجمد. ليلى شهقت. سليم همس: "إنت... كنت عارف؟" جابر: "كنت بحاول أحميك." سليم ضحك ضحكة قصيرة، موجوعة. "حتى إنت يا جابر؟" جابر: "سليم، أرجوك اسمعني. أنا ما كنتش السبب في اللي حصل لأبوك." سليم: "بس إنت عارف مين السبب." جابر سكت. سليم: "صح؟" جابر أخيرًا قال: "أيوه." سليم حس إن الدنيا بتلف بيه. "مين يا جابر؟" جابر: "مش هقدر أقولك في التليفون." سليم: "يبقى تعالى المستشفى." جابر: "لا." سليم: "ليه؟!" جابر رد بصوت مرتعش: "لأن الشخص اللي ق/تل أبوك... واقف قدام باب المستشفى دلوقتي." سليم رفع عينه ناحية باب الغرفة. ليلى لفتت بسرعة. وفي اللحظة نفسها... انطفأت أنوار الممر. وسمعوا صوت خطوات بطيئة بتقرب من الباب. خطوة... ثم خطوة تانية... وبعدها صوت مقبض الباب وهو بيتحرك. سليم وقف قدام ليلى، وحاوطها بدراعه. الموبايل لسه على ودنه. همس: "جابر... مين اللي قدامي؟" لكن جابر ما ردش. لأن صوتًا آخر خرج من الهاتف، صوت الرجل المجهول نفسه: "مساء الخير يا سليم... وحشتني." الباب بدأ يتفتح ببطء. وسليم رفع عينه... ليجد أمامه الرجل الذي كان يطارده في كل الصور. الرجل الذي يحمل نفس الخاتم. والذي يعرف سر الحادثة. لكن المفاجأة الحقيقية... إنه لم يكن غريبًا عن سليم. كان شخصًا يعرفه جيدًا. شخصًا ظن سليم أنه مات منذ سنوات طويلة. يتبع...