حكايات ملك ابراهيم

"حكايات الكاتبة ملك إبراهيم.. داليا دخلت المستشفى الصبح وهي حاسة إن في حاجة غريبة، الممرضات ماشيين بسرعة والعمال بيمسحوا الأرضية للمرة التانية وكل واحد بيتهامس مع التاني: "هو في إيه النهارده يا سمر؟ المستشفى كإنها مستنية رئيس جمهورية!" سمر ردت وهي بتضبط الورق في إيديها: "مش عارفة يا دكتورة.. بيقولوا مدير المستشفى عامل اجتماع لكل الدكاترة الساعة تسعة، وهيعرفنا على صاحب المستشفى الجديد." داليا ابتسمت ابتسامة صغيرة وهي بتعدل سماعتها على رقبتها: "يا سلام.. صاحب جديد! يا رب يكون بيفهم في الطب مش في الفلوس بس." دخلت قاعة الاجتماع وقعدت في صف وراني، وبعد دقيقة قعد جنبها زميلها دكتور تامر: "صباح الخير يا داليا.. شكلك مش نايمة كويس." ردت عليه وهي بتضحك بتعب: "سهرانة على حالة امبارح يا تامر.. ولا تشغل بالك." مدير المستشفى وقف قدام الكل وكحّ كحة خفيفة والقاعة سكتت: "يا جماعة.. النهارده عندي ليكم خبر مهم. المستشفى اتباعت لمستثمر جديد، ودكتور كبير جدًا في مجاله، رجع مصر من برا بعد سنين طويلة، ويشرفني أقدمه لحضراتكم.. دكتور فريد." الباب اتفتح وداليا رفعت عينيها بملل وفجأة قلبها وقع في رجليها، فريد دخل بخطوات ثابتة وواثقة لابس بدلة شيك لونها كحلي ولحيته بقت أتقل شوية فادته وقار وهيبة، حتى ريحة البرفان اللي وصلتها من بعيد كانت هي هي نفس النوع اللي كانت بتعشقه: "صباح الخير يا جماعة.. أنا دكتور فريد، وفرحان إني معاكم النهارده." داليا إيديها اتجمدت على الورقة اللي قدامها ووشها سخن وبقى أحمر: "مش معقول.. مش ممكن.. ده هو فعلًا؟" عيون فريد لفت على الوجوه واحد واحد ومرت عليها زيها زي الباقيين من غير ما توقف ثانية كإنه عمره ما شافها قبل كده. داليا همست جواها بحزن : "أكيد فاكرني خاينة.. وأنا اللي خليته يفكر كده." وهي قاعدة مكانها رجعت بذاكرتها لأول يوم شافت فيه فريد، كانت في تانية طب بنت بسيطة لابسة هدوم نضيفة بس قديمة وشايلة كتبها على صدرها وبتجري على المحاضرة، اتخبطت في شاب طويل وسيم والكتب وقعت منها كلها: "آسفة آسفة، معلش مكنتش شايفة!" الشاب انحنى يلمّ الكتب معاها وابتسم: "ولا يهمك.. أنا فريد، سنة رابعة. وإنتي؟" قالتله بكسوف: "داليا." كل الجامعة كانت تعرف فريد ابن صاحب أكبر مستشفيات البلد، بس هو من يوم ما شاف داليا ما بصش لحد غيرها: "إنتي الوحيدة اللي بتبصي في عيني، مش في عربيتي وفلوسي يا داليا." كانت بتضحك وتخبي وشها بإيديها: "عشان عيونك أحلى من اي حاجة في الدنيا " قعدوا سنتين مع بعض بيذاكروا في مكتبة الكلية وبياكلوا سندوتشات الفول في الكافتيريا، وداليا كانت أوقات بتخاف من الحلم الحلو ده: "أنا خايفة يا فريد.. الحلم ده مش يكمل." فيمسك إيديها ويقول بحنان: "طول ما أنا جنبك مفيش حاجة هتخوفك. أنا مش هسيبك أبدًا." ومكنش يعرف إن وعد زي ده ممكن الدنيا تكسره غصب عنه، في يوم والدة فريد عرفت من واحدة صاحبتها إن ابنها مرتبط ببنت فقيرة في الجامعة ووشها اتغير: "ابني أنا؟! يتجوز بنت ساعي؟! على جثتي!" ومن غير ما تقول لحد لبست أفخم هدومها وراحت بسواقها على العنوان اللي جابته، بيت داليا كان بسيط ونضيف والأم ماسكة صينية الشاي والأب قاعد على كرسيه الخشب القديم، دخلت الست من غير ما تستأذن وبصت للبيت كله بنظرة احتقار: "أنا والدة فريد.. وجيت أقولكم كلمتين وهمشي. بنتكم تبعد عن ابني، وإلا هدمر حياتكم كلها." داليا وقفت مصدومة والدموع في عينيها: "يا طنط.. أنا مش..." الست قاطعتها بحدة: "اسكتي! أنا مبكلمش اللي زيك." وبعدين لفت لأبوها وقالت بسخرية جارحة: "إنت بتشتغل ساعي في شركة صح؟ ابني المصروف اللي بياخده في الشهر أكتر من مرتبك في سنة.. فاكر إن بنتك تنفع تبقى مرات فريد؟ فوق يا راجل، واعرف مقامك." الأب مكانش بيتكلم بس وشه كان بيصفر وإيده ماسكة قلبه، وبعد ثواني وقع على الأرض فجأة، داليا صرخت وجريت عليه وهي بتبكي: "يا بابا!! بابا!!" في المستشفى داليا قعدت جنب سرير أبوها ساعات طويلة ماسكة إيده وبتدعي ربنا ينقذه، ولما فتح عينيه أخيرًا بصلها بحنان وبصوت ضعيف: "داليا يا بنتي.. أنا عمري ما طلبت منك حاجة.. بس النهارده هطلب. ابعدي عن الولد ده، ووافقي على العريس اللي متقدملك. أنا عايز أطمن عليكي قبل ما أموت." دموعها نزلت غصب عنها: "متقولش كده يا بابا.. ربنا يديك الصحة." بس هو ضغط على إيدها بإصرار: "اوعديني يا داليا." وهي كانت عارفة إن ابوها تعب وضحى بعمره كله عشانها ومستحيل تكسره أكتر، همست: "أوعدك يا بابا.. أوعدك." فريد عرف يوم خطوبتها من واحدة من اصحابها وجري عليها وهو مش مصدق، لقاها واقفة ب فستان بسيط.. لابسة دبلة جديدة ووشها متجمد من غير أي تعبير: "داليا.. قوليلي إن ده مش حقيقي.. قوليلي إن ده مجرد مقلب!" بصتله ببرود وبصوت كان بيرتعش من جواها وهي بتحاول تخبيه: "ده حقيقي يا فريد. أنا وافقت على عريس جاهز ومناسب.. أنا بدور على مصلحتي. وأنا عمري ما حبيتك، كنت بس بتسلى وبستغل إنك غني وبتحبني.. أرجوك ابعد عني عشان أعرف أعيش حياتي مع خطيبي." فريد بص لها كإنه مش شايفها: "كنتي بتخدعيني.. السنتين دول كلهم كدب؟" وهي ردت بقلب بيتقطع وصوت ثابت: "اه كلهم كدب." الدنيا لفت بيه ومشي من غير ما يلتفت لها تاني، وراها دمعة واحدة سابتها تنزل بعد ما اتأكدت إنه مشي. فريد انهار وساب الكلية وقعد في أوضته أيام مبياكلش ولا بيتكلم، أهله لقوا إن الحل في السفر وقالوله يكمل دراسته برا عشان ينسى، وهو وافق من غير نقاش. بعد أسبوع واحد من سفره داليا فسخت الخطوبة: "أنا آسفة يا بابا.. أنا عارفة إني كسرت وعدي، بس مش هقدر أظلم الراجل ده معايا." وأبوها اللي كان فاهم قلب بنته أكتر ما هي فاهمة بصلها بحزن وسكت، وعدت ست سنين، داليا اتخرجت واشتغلت في المستشفى وقفلت على قلبها. داليا فاقت من ذكرياتها على همسة تامر في ودنها بيقولها على فريد : "شكله مغرور أوي الدكتور الجديد ده.. شايف نفسه علينا كلنا." ومن غير ما تلتفت له حست بنظرة نارية جاية من قدام القاعة، فريد كان واقف بيبص ناحيتهم وفكه مشدود: "الاجتماع انتهى.. كل واحد يرجع على شغله فورًا." الكل قام مستغرب من النبرة الحادة، وتامر همس لداليا وهو ماشي: "مش قلتلك مغرور؟" وهي ما ردتش كانت ماشية بخطوات تقيلة وقلبها بيوجعها، ومن اليوم ده حياة داليا في المستشفى اتغيرت، فريد بقى في كل مكان: "دكتورة داليا، التقرير ده ناقص." "دكتورة داليا، ليه اتأخرتي خمس دقايق؟" تاني يوم في بريك الغدا داليا كانت قاعدة بتضحك غصب عنها مع تامر في الكافتيريا، تامر كان بيحكي على حالة كشف غريبه النهاردة وكانوا بيضحكوا سوا. وفجأة حسّت بالهوا تقل، رفعت عينيها لقت فريد واقف ورا تامر مباشرة وعينيه مسمرة عليها، وشه كان جامد ومفيهوش نقطة هزار، تامر اتوتر. فريد ما بصش لتامر حتى، قال بنبرة هادية تقطع: "دكتور تامر، هتسهر الليلة مكان دكتور حسام." تامر اتصدم: "بس يا دكتور أنا..." فريد قاطعه وهو لسه بيبص لداليا: "ده قرار إدارة، مش نقاش." وسابهم ومشي، داليا حست إن نفسها اتكتم وقامت هي كمان، كانت فاهمة إن الغيرة هي اللي بتتكلم مش الإدارة. وبعد كام يوم داليا كانت في عملية دقيقة ومش مركزه كويس.. لأنها نامت ساعتين بس.. إيدها غلطت غلطة صغيرة بس خطيرة، الجهاز بدأ يزعق وضغط المريض نزل فجأة، الممرضة صرخت: "الضغط بيقع يا دكتورة!" وداليا وشها اتخطف وإيديها بدأت ترتعش: "يا رب.. يا رب استرها." مش عارفه تعمل إيه. الباب اتفتح بقوة وفريد دخل بسرعة البرق بصّ على الشاشة ثانية واحدة وقال بصوت حاسم: "ابعدي." وقف مكانها وبدأ يكمل هو العملية بإيدين ثابتة، وبعد دقايق طويلة المريض حالته استقرت، وبعدين لف لها وصوته عالي ومليان غضب: "إنتي مستهترة! مش فارق معاكي حياة الناس؟! إزاي تدخلي عملية وإنتي مش مركزة؟!" داليا دموعها نزلت وهي بتقول بصوت مبحوح: "أنا آسفة يا دكتور.. أنا غلطت." وخرجت من أوضة العمليات تجري. فريد وقف مكانه يبص على الباب اللي خرجت منه وقلبه بيتقطع: "أنا عملت إيه؟" ورغم كدا رجله ما استحملتش وراح ناحية مكتبها عشان يصالحها. قبل ما يدخل سمع صوت تامر جاي من جوه: "متزعليش نفسك يا داليا.. الدكتور فريد ده مغرور ومتكبر، وبيتعامل معاكي بطريقة مش لطيفة." فريد وقف مكانه وإيده على مقبض الباب مستني يسمع شكوى جديدة منها، بس داليا ردت وصوتها مليان دموع: "لا يا تامر.. متقولش كدا. الدكتور فريد عنده حق، أنا اللي غلطانة، ولو كان اتأخر ثانية كان المريض مات." وسكتت لحظة وكملت بحنان مكسور: "هو دكتور كويس ومعاه حق في كل اللي بيعمله." فريد رجع بخطوات بطيئة ناحية مكتبه ووقف عند الشباك: "بتدافع عني؟ بعد كل اللي عملته فيها؟ ليه؟" والسؤال ده فضل يلف في دماغه. وهو مروح لمح داليا داخلة الأسانسير لوحدها، دخل وراها بسرعة قبل ما الباب يقفل، الأسانسير كان فاضي وهما الاتنين لوحدهم. داليا اتوترت وبصت في الأرض. فريد مقدرش يمسك نفسه، القهر اللي جواه طلع مرة واحدة: "سمعتك بتدافعي عني قدام تامر؟ ولا دي تمثيلية جديدة؟ زي ما مثلتي عليا زمان إنك بتحبيني وطلع كله كدب؟" داليا رفعت عينيها مصدومة والدموع اتجمعت فيها: "أنا عمري ما مثلت عليك." فريد قرب خطوة وصوته واطي بس بيوجع: "أومال اللي حصل في الخطوبة بتاعك ده كان إيه؟ كنت بتتسلي بيا عشان فلوسي؟" الكلمة نزلت عليها زي القلم، دموعها نزلت غصب عنها وشهقت: "حرام عليك.. إنت متعرفش حاجة." فريد مسك ايديها بقوة وهو بيسألها: وفين دبلتك؟ ولا كنتي بتتسلي بالعريس هو كمان؟ ردت بقهرة: أبعد عني لو سمحت. فريد أول ما شاف دموعها ندم، قلبه اتقبض ومد إيده لا إراديًا مسح دمعة نازلة على خدها. داليا بعدت وشها عنه بسرعة ومسحت دموعها بإيدها: "لو سمحت يا دكتور فريد، سيبني في حالي." الباب اتفتح وخرجت تجري، وفريد فضل واقف جوه الأسانسير لوحده ضارب إيده في الحيطة: "غبي.. غبي." حكايات الكاتبة ملك إبراهيم في المساء قعد فريد مع صاحبه القديم إيهاب في مطعم هادي وكان ساكت أغلب الوقت بيحرك في كباية العصير، إيهاب كان عارف حكاية حبه من زمان فبصله وقال: "قولي يا فريد.. هتفضل مخبي اللي جواك لحد إمتى؟" فريد تنهد وحكى له على كل حاجة: "من ورايا بتدافع عني، ولما بشوفها قلبي بيتلخبط.. مش عارف اكرهها." إيهاب سكت شوية وبعدين قال بهدوء: "إنت عمرك فكرت داليا لسه ما اتجوزتش لحد دلوقتي ليه ؟ حتى الشخص اللي اتخطبتله سابته بعد ما انت سافرت بأسبوع واحد! ومن يومها ما قبلتش حد، رغم إنها دكتورة وجميلة وأكيد جالها فرص كتير.. ليه يا فريد؟ إلا لو كانت بتحبك بجد." فريد : "فكرت كتير في كل دا ومش قادر افهم هي عايزه إيه .. ." إيهاب حط إيده على كتفه: "افهم الحقيقة قبل ما تحكم." ومن الليلة دي فريد بدأ يدور وراها، في يوم وقف جنب سمر الممرضة وهو بيراجع ملف مريض وسألها بصوت عادي يخبي فضوله: "سمر.. هي دكتورة داليا بتفضل في المستشفى بعد مواعيدها كتير؟" سمر ابتسمت بتردد: "دايمًا يا دكتور.. بتقعد جنب المرضى الغلابة لحد ما تطمن عليهم، واوقات كتير بتدفع من جيبها تمن العلاج لأي حد ما معاهوش.." فريد سكت وقلبه اتقبض. وبعد يومين وهو ماشي في الطرقة لمح حاجة بتلمع على الأرض، سلسلة مفاتيح فضية صغيرة وقعت من شنطة داليا وهي بتجري و متأخرة ، فريد انحنى ياخدها وفجأة إيده اتجمدت، على السلسلة حرف "F" محفور بخط رفيع وهو عارفه كويس لأنه هو اللي اشتراها وهداها لها في أول عيد ميلاد لها وهما سوا. جري وراها لحد ما لحقها قدام الأسانسير ومد إيده ناحيتها: "وقعت منك." داليا بصت للسلسلة وقلبها وقع واتلخبطت وهي بتاخدها منه بسرعة: "شكرًا يا دكتور." فريد بص لها بنظرة هادية وسألها بصوت هادي: "لسه محتفظة بيها؟" هي رفعت عينيها وبعدتها على طول: "دي حاجة قديمة نسيتها في الشنطة وخلاص." بس إيدها اللي بتترعش وهي بتقفل الشنطة قالت كل حاجة، وفريد ابتسم لأول مرة من يوم ما رجع ابتسامة صغيرة فيها راحة وأمل: "حاجة قديمة.. تمام يا دكتورة." ومشي وهو حاسس إن لسه في امل. بعد يومين. كان بيمر على الحالات.. وماشي في طرقة الأطفال سمع صوت صغير بينادي: "دكتورة داليا!" كانت ليلى بنت صغيرة عندها سبع سنين كانت عاملة عملية قلب وبتحب داليا أوي. البنت قالت: انا هخرج النهاردة يا دكتورة داليا.. زعلانة عشان مش هشوفك تاني. داليا أبتسمت لها بحب وهزرت معاها بلطف. البنت : "أنا بحبك أوي يا دكتورة داليا." داليا ضحكت وشالتها: "وأنا بحبك أكتر يا ليلى يا قمر." ليلى لفت وبصت لفريد اللي واقف بيتفرج عليهم وابتسمت ببراءة وهمست ل داليا: "وبحب دكتور فريد عشان شكله حلو زي الأمير في الحكايات، صح يا دكتورة؟؟" داليا وشها احمر مرة واحدة واتوترت ونزلت ليلى بسرعة: "إيه الكلام ده ياليلي ؟ عيب نقول كده ." فريد مقدرش يمسك ضحكته، قرب منهم وقال لليلى وهو بيغمز لها: "شكرًا يا ليلى، إنتي اللي أميرة جميلة." داليا بصتله بنظرة متوترة ومشيت بسرعة كإنها بتهرب. فريد وقف يبص عليها بحب. ....... بعد كام يوم. والدة فريد قررت تزور المستشفى اللي ابنها اشتراها وكانت بتتمشى بشموخ في الطرقة لحد ما شافت داليا لابسه بالطو الاطباء ودخلت مكتب وقفلت الباب. والدة فريد راحت وراها وفتحت الباب من غير ما تخبط وداليا رفعت راسها مصدومة: "حضرتك ..؟" والدة فريد دخلت وصوتها عالي : "انتي بتعملي ايه هنا؟ عرفتي ان فريد رجع وعايزه تضحكي عليه تاني زي زمان؟" داليا قامت واقفة وإيديها بتترعش: "أنا مش بضحك على حد.. انا بشتغل هنا من قبل ما فريد يرجع." والدة فريد: تسيبي المستشفي دي وتمشي حالا.. اختفي من حياة ابني.. انا لما صدقت خلصت منك زمان.. عايزه ترجعي تدمري حياة إبني تاني. داليا قالت ببكاء: كفايه بقا.. انا مش هنفذ اوامرك تاني. في اللحظة دي.. فريد كان عرف ان والدته موجودة هنا.. كان بيدور عليها.. سمع الأصوات العاليه جايه من مكتب داليا.. قرب من المكتب وقبل ما يدخل سمع صوت داليا وهي بتقول ببكاء: زمان نفذت اوامرك.. ولسه لحد دلوقتي فريد مصدق ان انا خاينه.. والحقيقه ان انا عمري ما حبيت غيره.. وضحيت بحبي له عشان ارضي غرورك. فجأة الباب اتفتح وفريد دخل مصدوم وقال: " إيه الكلام اللي سمعته ده ؟" الأم اتسمرت وفريد دخل بخطوات تقيلة: "إنتي اللي فرقتينا زمان؟ إنتي اللي عملتي كدا ؟!" والدته حاولت تبرر بصوت مرتبك بس بعد ثواني قالت بتحدي: "أيوه أنا! ومش هسمح إنها تبقى مراتك أبدًا، دي مش من مقامنا!" داليا حست إن الأرض بتدور بيها وعيونها اتملت دموع إهانة: "متخافيش يا طنط.. أنا مستحيل أتجوز ابنك. أنا هنا بشوف شغلي وبس، ومعنديش حاجة تانية." والدة فريد معرفتش ترد بعد ما ابنها عرف الحقيقه.. خرجت بغضب وفريد وقف مصدوم بيبص على داليا اللي كانت بتحاول توقف دموعها: "داليا.. ليه مقولتيش الحقيقه زمان.. ليه خلتيني اصدق انك خاينه ." داليا هزت راسها بحزن وقالت: "مفيش فايدة يا فريد.. أنا وعدت بابا إني مستحيل أتجوزك. اي كلام في اللي فات مش هيفيدنا بحاجة." ومشيت بسرعة وسابته واقف مكانه. همس فريد بإصرار : "مش هسيبك تضيعي مني تاني يا داليا.. أبدًا." حكايات الكاتبة ملك إبراهيم. نفس الليلة داليا خرجت من المستشفى متأخرة كانت الساعة داخلة على عشرة والشارع ضلمة وهادي، وهي ماشية بسرعة ماسكة شنطتها سمعت صوت شاب طالع من عربية : "إيه يا قمر؟ ماشية لوحدك ليه في وقت زي ده؟ تحبي أوصلك؟" داليا مردتش وزودت خطوتها، بس الشاب نزل ومشى وراها: " استني بكلمك، إنتي بتتكبري عليا ولا إيه؟" داليا قلبها وقع وقالت بصوت عالي وهي مرعوبة: "لو سمحت ابعد عني!" وفجأة نور عربية ضرب في وشهم، باب العربية اتفتح بعنف ونزل فريد، مسك الشاب من هدومه وزقه على العربية: "إنت اتجننت؟! بتكلمها كده إزاي؟!" الشاب اتوتر لما شاف فريد وغضبه: "يا عم وإنت مالك؟" فريد ضربه بوكس في وشه خلاه يقع: " لو لمحتك تاني في الشارع ده هكسر رجلك." الشاب قام يجري وركب عربيته ومشي بسرعة، داليا كانت واقفة بترتعش ودموعها نازلة من الخضة، فريد لف لها ومسك دراعها بحنان وقلق: "إنتي كويسة؟ ؟" داليا هزت راسها وهي بتعيط: "لا.. أنا.. أنا كنت خايفة." فريد فتح باب عربيته وقال بلهفة: "اركبي.. مش هسيبك تمشي لوحدك تاني." ركبت وهي لسه بترتعش، طول الطريق كان سايق وعينه عليها كل ثانية، وقبل ما تنزل قدام بيتها بص لها بجدية وخوفه لسه في عينيه: "متروحيش متأخر تاني لوحدك يا داليا، فاهمة؟ الدنيا مبقتش أمان، وأنا قلبي مش هيستحمل أشوفك في موقف زي ده تاني." داليا بصتله وعينيها مليانة دموع وامتنان وهمست: "حاضر." داليا رجعت البيت بعد يوم المواجهة وهي مرهقة كأن حد شال من عليها عمرها كله، قعدت في أوضتها في الضلمة وسابت دموعها تنزل من غير صوت، لحد ما سمعت خبطة خفيفة على الباب، كان صوت أبوها: "ينفع أدخل يا داليا؟" دخل ببطء وقعد جنبها على طرف السرير وحط إيده على كتفها بحنان: "إنتي بتعيطي من ست سنين يا بنتي، وأنا كنت بعمل نفسي مش شايف." داليا مسحت دموعها بسرعة وحاولت تضحك: "لا يا بابا، أنا كويسة، دا بس شغل ومرهقة." الأب هز راسه بابتسامة حزينة: "أنا أبوكي يا داليا.. أعرف ضحكتك الحقيقية من الكدب." سكت شوية وبعدين قال بصوت متهدج: "أنا يوم ما طلبت منك تبعدي عنه كنت خايف عليكي، بس نسيت إني بحرمك من أغلى حاجة في عمرك. وكل يوم بشوفك فيه بتدبلي شوية شوية، كنت بلوم نفسي." داليا حضنته وهي بتبكي: "متقولش كدا يا بابا، إنت عمرك ما غلطت في حقي." فقال وهو بيطبطب على ضهرها: "أنا غلطت يا بنتي لما خليتك تضحي بقلبك عشان تريحيني. ولو الراجل ده جه تاني.. متقفليش الباب في وشه." داليا مردتش بس حضنتُه أكتر، وللمرة الأولى من سنين نامت وقلبها مش تقيل. تاني يوم فريد وقف قدام بيت داليا البسيط ماسك ورد أبيض وقلبه بيدق بسرعة، الباب اتفتح وأبو داليا ظهر وشه اتغير لما شافه: "أهلًا يا دكتور.." فريد بكل احترام: "أنا جيت أعتذر عن اللي حصل زمان يا عمي.. وجيت أطلب إيد بنتك. أنا بحبها، وعمري ما حبيت غيرها." الأب سكت شوية وبص له بنظرة مليانة تقدير: "إنت راجل بجد يا ابني.. وأنا شايف في عينيك الحب اللي هيطمني علي بنتي." داليا رجعت من الشغل لقت فريد قاعد جوه البيت وأبوها بيبتسم: "تعالي يا بنتي.. دكتور فريد جاي يطلب إيدك.. وأنا موافق." داليا وقفت مكانها مش مصدقة وقلبها بين الفرحة والخوف: "بس يا بابا.. أنا وعدتك.." أبوها مسك إيدها بحنان: "وأنا يا بنتي كنت غلطان لما خليتك توعديني. القلب لما بيحب بصدق، ما بيتجبرش عشان يفارق." داليا كانت عنيدة وكبريائها اللي اتجرح زمان خلاها تقول: "مش هينفع يا فريد.. عيلتك الكبيرة مش هتقبلني، وأنا مش هدخل بيت مرفوض فيه وجودي." دخلت اوضتها وسابتهم. والد داليا قال ل فريد: معلش يابني.. سيبها تفكر وأكيد هتغير رأيها. بس فريد ما استسلمش كان كل يوم وكل لحظة بيحاول يتكلم معاها.. ويبعت لها في رسايل طول الليل والنهار : "سامحيني يا داليا.. واسمحيلي أصلح اللي اتكسر بينا ." ولما كانت تتجاهله كان يبتسم بصبر ويقولها: "هستناكي.. ست سنين استنيت وكان عندي امل، وهفضل استناكي لاخر العمر." وفي ليلة هادية. كانت سهرانه في المستشفي. خلصت شغلها ووقفت تشرب حاجة دافيه في جنينة المستشفى. فريد وقف وراها وسألها : "قوليلي إنك مش بتحبيني وأنا هبعد.. قوليها وإنتي بتبصي في عيني." داليا لفت ليه وما قدرتش تتكلم.. دموعها نزلت وهمست بصوت بيرتعش: "مقدرش أقولها .. عمري ما قدرت اقولها حتى بيني وبين نفسي ." فريد قربها ليه وهو بيقول بحب: "وأنا عمري ما بطلت أحبك.. وافقي يا داليا.. إحنا اتوجعنا كتير اوي.. جه الوقت عشان نكون مع بعض ونفرح " داليا هزت راسها بالموافقه وسابت قلبها يرتاح بعد ست سنين تعب. حكايات الكاتبة ملك إبراهيم في بيت عيلة فريد. دخلت والدة فريد مكتب جوزها بخطوات تقيلة وقعدت قدامه من غير كلام، الأب رفع عينيه وسألها بهدوء: "إنتي زعلانة من ابنك ليه؟" هي ردت بعناد: "ابنك بيحب بنت مش من مستوانا، ومش هسمح..." الأب قفل الملف وبصلها نظرة طويلة: "إحنا مستوانا إيه يا سعاد؟ إنتي نسيتي إني اتجوزتك وأنا بشتغل في مستشفى صغيرة وماكنش معايا غير شهادتي؟ نسيتي إن أهلك رفضوني زمان وقالولي إني مش من مستواكم؟" الست اتسمرت مكانها ودمعة نزلت منها من غير ما تحس: "الموضوع مختلف.. دا ابني الوحيد." قال الأب بحنان: "عشان كدا لازم نسيبه يعيش سعيد. ابنك مش هيسامحنا لو ضيعنا منه حبه مرتين.. وساعتها مش هتلاقي ابنك جنبك تاني." الست سكتت وبعدين مسحت دموعها بإيدها وقالت بصوت واطي: "أنا كنت خايفه عليه وبس.. يمكن غلطت.. بس في النهاية كل اللي يهمني هو سعادته وبس" ....... فريد رجع من المستشفي بعد ما خد موافقة داليا. راح لأهله وقف قدام أمه وأبوه بكل ثبات: "أنا هتجوز داليا. دي البنت اللي بحبها، ومفيش حد في الدنيا هيغير قراري.. ومش هقبل إن حد يهينها تاني." أبوه بص لأمه نظرة طويلة وسكت وفي الآخر قال بهدوء: "مبروك يا ابني." والأم رغم كبريائها دمعت لما شافت سعادة ابنها وما قدرتش تعارض. وعملوا فرح كبير قاعة مليانة نور وزهور، داليا بفستان أبيض بسيط وجميل وفريد واقف مستنيها بابتسامة مش قادر يخبيها، وأبوها ماشي بيها في الممر بخطوات فرحانة ودموع السعادة في عينيه: "ربنا يسعدك يا بنتي." وفريد مسك إيدها وهمس في ودنها: "قولتلك زمان إني مش هسيبك أبدًا.. وأخيرًا قدرت أوفي بوعدي." داليا ابتسمت وعينيها بتلمع: "وأنا آسفة إني خليتك تستنى كل ده." فريد ضحك وقال: "كل لحظة استنيتها كانت تستاهل لحظتنا دي." ورقصوا سوا وسط تصفيق الجميع، واكتملت حكاية الحب اللي كل الجامعة اتكلمت عنها زمان.. حبهم الحقيقي كان أقوي من الفراق والكبرياء والزمن.. وحكايتهم انتهت بسعادة.. حكايات الكاتبة ملك إبراهيم. تمت