امل نصر
والنبي صح الخطوبة متمتش يعني عاليا موافقتش ع العريس الغني لا يا ختي موافقتش ع العريس الغني ما لك يا ست انتي فرحانة كدة ليه لهو العريس مكانش عاجبك انتي كمان ايوة مكانش عاجبني عاليا تستاهل سيد سيده واللي أحسن منه كمان.
قالتها وهي بتبص عليا بابتسامة مش مفهومة امي علقت على كلامها اديها يا ختي قاعدة لما نشوف بقى اللي هيجي أحسن منه ولا هتندم ونقول فرصة وراحت . قالتها امي وكانها بتقطمني لكن خالتي ام كريم نقلت تبصلي من تاني وكلامها ظهر وكأنه تلميح صريح مش هتسننى ولا هتقعد فرصتها موجودة وعربسها كمان موجود بس هي تقول اه.
عند الأخيرة وامي انتبهت ع الكلام راحت باصالي عشان تطلب مني بت يا عاليا روحي اعمليلنا كوبايتين شاي انا وخالتك ام كريم قومي يا بت دماغي مصدعة. ماشي ياما عن اذنكم. قومت ع المطبخ وسيبتهم بس من جوايا كان نفسي اكمل القعدة واشوف اخر الكلام وخالتي ام كريم قصدها ايه حتى وانا في المطبخ كنت بحاول ارمي ودني لكن الصوت كان وقتها مكتوم بشكل غريب وبحير دا لأن في العادة كدة صوت امي اساسا عالي في بيتنا وجلسنا مع صاحبتها بتبقى ملعلة بأصوات ضحكهم ومناكفتهم في بعض طول الوقت لكن يبقى واطي وبالشكل ده اهي دي بقى عمرها ما حصلت غير النهاردة!
هي قالتلك كدة ياما كريم كان بيحبني انا طب ازاي دا ساب البلد وقال عدولي يعني لو عايزني صح كان ع الأقل لمح ولا هو كان ضامن ان هفضل مستنياه. يا بت ما هي امه قالت ع الحكاية دي وضحتلي ان اللي كان مانعه هو ظروف والده لما كان تعبان وهلكهم في الجري ع الدكاترا والمستشفيات حتى قرار السفر اتخذه مخصوص عشان يقدر يحوش حق جوازه منك دي امه هي اللي قالت كدة.
اه امه! دي اللي جابتلي العريس الو بنتين عشان تجوزني وتخلص مني انتي مصدقة الكلام ده ياما يا بت افهمي وميبقاش ظنك سيء الولية مكنتش تعرف بالكلام ده غير بعد هو ما رجع من السفر على مشمه لما سمع بأمر الخطوبة دي بتقولي انه طين عيشتها اول ما رجع اتاريه كان متابع كل اخبارك يا حلوة!
معقول! هو الكلام دا بجد صح ولا انا بنسج من خيالي اوهام دي بتقول انه بيحبني! وكمان كان متابع اخباري! معقول! انا طول عمري حاسة بكدة من ناحنيه بس كتر السكات وطول المدة خلاني ازهق واكدب كل دا في نفسي وحتى وامي بتحاول تقنعني دلوقتي انا كنت بجادل بتشكيك في الأمر لاني بصراحة مش مصدقة.
