امل نصر
رددتها ورايا بصوت خضني وحسسني ان قولتها تلاتين ولا أربعين لكن بعدها كملت تتكلم على ابنها انا ابني راضي بقى ست وعشرين وعلى اخر السنة دي هيكمل سبعة وعشرين يعني الفرق بينكم سنتين… يالا بقى مش مهم. اهم حاجة ألوفق وان ربنا يهديكم على بعض.
ومالها بتقولها كدة واكنها بتتجمل عليا. قولتها في نفسي لكن طبعا مقدرتش اتكلم والست ام كريم تقول هي كمان دي عاليا دي زي بنتي ادب وأخلاق مبتشوفش الشارع ولا بتعتبوه ابوها صعب والخروج دايما عنده بحساب. اممم يا ما شاء الله .
قالتها الست وامي كملت هي كمان بطيبتها اللي تشل اه والنبي يا ختي دي طول اليوم خدمة في البيت وشايلاني وشايلة اخواتها الشباب ربنا يحرسها حبيبة قلبي قطة مغمضة. لا يا ختي احنا مش عايزينها قطة مغمضة.
قالتها فجأة الست خضت امي وخضتني معاها. ليه يا ست حمدية سألتها ام كريم والست ردت وهي مركزة عيونها عليا شوفي يا قمر مفيش حد ميحبش الأدب بس يا حبيبتي الواحدة لازم تبقى حركة ولونة مع جوزها القطة المغمضة دي مبقتش تنفع مع شباب اليومين دول خصوصا مع واحد زي ابني دا لف ودار وشاف بنات ياما يعني لازم تبقى عروسته لهلوبة وتلف عقله انا عايزاك تنسينه اهله تنسيه القديمة.
…. نعم! خرجت الكلمة بسؤال مني ولكن الست مدتنيش الفرصة استفسر لأنها كانت بتشكر في ابنها وانه لسة صغير وشكله حلو زي ما بتقول وبيبلبس ع الموضة وهاتك يا رغي وبعدها فجأة لقيتها بتقول لأمي طب احنا كدة نجيب العريس عشان يشوف العروسة ويشوفها بقى يا حجة ومالو يا حبيبتي تأنسي وتشرفي بس استني اشوف الحج والدها يمكن يسأل.
.. تسألي على مين يا ست ام عاليا دا احنا ناس اشهر من الڼار ع العلم في بلدنا اسالوا عننا براحتكم بس بقى يبقى السؤال بالمرة بعد ابني ما يجي ويشوفها وتشوفه اصله مسافر بكرة بقى…
امي احرجت اوي من الست لدرجة انها بصت لجارتها عشان تساعدها واللي حاولت تدخل هي التانية بس بقى الست حمدية صممت انها تاخد ميعاد من امي عشان تيجي مع ابنها وامي اضطرت تهاودها في الاخر بس طبعا بعد ما تقول لابويا الحاجة الغريبة بقى هي ان الست بعد ما خدت غرضها بالموافقة لقيتها بتلفلي وشها قبل ما تخرج من باب البيت وبتسألني بقولك ايه يا قمر عايزاكي لما تحضري المقابلة ما تلبشيش طقم خروج احضري المقابلة بعباية بيتي نعم!
