امل نصر
طلب غريب من ست غريب والأغرب هو اقناع امي ليا انه طلب عادي وانا مش قادرة التدخل في حاجة زي دي يعني ايه يعني حد يتدخل في اللبس كمان المهم بقى اني وافقت ودا لعدة اسباب اهمها طبعا هو اني مطيعة وعمري ما اعترض على رأي تقوله والدتي والحاجة التانية هي اني حبيت ادي نفسي فرصة واشوف ايه أخرتها مش يمكن يكون كويس.
بعد المغرب كان ميعاد العريس المنتظر بعد ابويا ما وافق بالعافية بعد الزن على دماغه من ناحية امي وتبرير ام كريم ان الموضوع مجرد تعارف. لبست انا عباية استقبال من شنطة الهدوم اللي شيلاهالي امي لجوازي مع اني مكنتش بالعة الأمر وظبت نفسي عشان ادخل للچماعة.
دخلت اسلم عليهم كانت الست حمدية اول واحدة تاخد بالها فلقيتها بتستقبلني بالتهليل يا اهلا يا عروسة ابني يا اهلا يا قمر. حاولت مبينش ضيقي من الجملة السابق لأونها وقدمت اسلم عليها وعلى اخوه الكبير وبعدها سلمت عليه هو بكل كسوف لقيته بيبتسم بوش منور واضح من مظهره كدة انه مهتم ببشرته اوي دا غير اللبس الشبابي اللي ع الموضة لا صارف صارف بجد يعني.
وبدأت القعدة شقيق العريس وهو بيتكلم بفخر عن عيلتهم وانهم يكلموا عمارت في بلدهم رغي في رغي ومجاملات ما بين العيلتين وكل ده وانا ساكتة وملاحظة نظرات العريس الجريئة ليا لدرجة اني مكنتش بقدر ارفع عيني ناحيته لحد اما بدأ بقى الحديث الجد.
احنا ناس شارين يا حج وكل اللي تؤمر بيه عروستنا مجاب مش هنقصها عن اللي قبلها بشيء. هو انا سمعت غلط ولا هو يقصد مين بقبلها دي الكلام ده قولته في نفسي قبل ما والدي يسأله هو العريس كان متجوز قبل كدة وماله لما يبقى متجوز قبل كدة وحش بقى ولا نقص منه حتى يا ست الحجة محدش قال حاجة وحشة احنا لازم نسأل.
جراءة الست في الرد على ابويا بصراحة كان مفاجأة ليا قبل ما يفاجئني العريس هو كمان انا راجل مقتدر واقدر افتح بدل البيت اتنين وتلاتة. ايوة امال ايه اخويا راضي بيملك محل عطارة لوحده دا غير العمارات الملك اللي ورثها معايا من ابويا الله يرحمه .
حقة يا ابو العروسة بنتك لو وافقت على ابني حايبقى باضت لها في القفص . يا حجة احنا بنشتري راجل وما يهمناش الفلوس . واحنا ابننا سيد الرجالة . كل دا وانا قاعدة ساكتة شايفة العريس المتأنتك باللبس الشبابي وتسريحة الشعر اللي موقفه بالجل على دماغه .
