مريم قاعده في اوضتها

مريم كانت قاعدة في أوضتها الساعة اتنين بالليل وعنيها منفخة من العياط والمذاكرة، عندها امتحان مادة الدكتور طارق اللي كل الدفعة بتكرهه وبتسميه الدكتور النكدي، كانت فاتحة الكتاب وبتحاول تفهم أي حاجة ومش فاهمة، وفجأة صاحبتها حبيبة بعتتلها فويس بتقولها يا مريم مالك اختفيتي فين، مريم ردت عليها وهي بتعيط وبتقولها أنا تعبت والله يا حبيبة مش قادرة أكمل في الكلية دي، حبيبة قالت لها اهدي واشربي حاجة سخنة ونامي وبكرة هنروح الكلية سوا. بعد ما قفلت مع حبيبة مريم فضلت قاعدة لوحدها وحست إنها محتاجة تفضفض لحد، مسكت الموبايل وفتحت الواتساب وكتبت رسالة طويلة أوي، رسالة كانت كاتبة بقالها أسبوع بس مش قادرة تبعتها، رسالة لحبيبها فادي اللي سابها من شهرين، كتبت له فيها كل اللي جواها. كتبت يا فادي أنا عارفة إنك مش هترد بس محتاجة أقولك إني لسه بحبك، لسه بصحى كل يوم أدور على اسمك في الموبايل، ولسه بروح الأماكن اللي كنا بنروحها سوا، أنا عارفة إني كنت عصبية وكنت بضغط عليك بس والله كنت بحبك بجد، انت كنت الحاجة الوحيدة الحلوة في حياتي وسط كل القرف اللي أنا فيه، الكلية صعبة والدكاترة صعبين وأنا لوحدي من غيرك، فاكر لما كنت بتقولي إنك هتفضل جنبي مهما حصل، فين كلامك دلوقتي، أنا محتاجاك أوي، لو لسه في قلبك ذرة حب ليا ارجعلي، أنا مستنياك. كتبت الرسالة وعنيها مغرقة دموع وبعتتها بسرعة قبل ما تندم، وبعد ما بعتتها رمت الموبايل على السرير وغطت وشها ونامت من كتر التعب. صحيت الصبح على صوت المنبه لقت الموبايل فيه رسالة، فتحت بسرعة وقلبها بيدق جامد فاكرة فادي رد، لقت رسالة من رقم غريب مكتوب فيها ايه كل ده، هو انتي بتحبيه أوي كده، ده ميستاهلش دمعة واحدة منك، ده شكله عيل توتو. مريم اتصدمت وبصت على الرقم اللي بعتت له الرسالة، اكتشفت إنها بعتت لرقم غلط، الرقم آخره سبعة وسبعين وهي كانت فاكرة إنه رقم فادي اللي آخره سبعة وستين، فضلت تضرب كف على كف وتقول يا لهوي هعمل ايه دلوقتي، دي فضيحة. بسرعة كتبت له أنا آسفة جدا والله العظيم الرقم اتلخبط معايا، امسح الرسالة لو سمحت واعتبر إنك مشفتهاش خالص، أنا آسفة مرة تانية. الراجل رد بعد دقيقة وقالها لا خلاص أنا مسحتها بس بعد ما حفظتها عندي عشان لو احتجت أعيط شوية أقراها وأفتكر إن في ناس بتحب بالطريقة دي لسه، مريم اتكسفت أوي وكتبت له انت بتهزر، قالها بهزر طبعا بس بجد ايه كمية النكد اللي في الرسالة دي، انتي بتحبي واحد شكله ميت، مريم ضحكت غصب عنها لأول مرة من أسبوعين. قالها أنا رامي، وانتي، قالت له أنا مريم، قالها تشرفنا يا ست مريم يا صاحبة الرسايل الغرامية الطويلة، مريم قالت له والنبي امسح الرسالة بجد، قالها خلاص مسحتها متخافيش، بس قوليلي هو فادي ده يستاهل كل ده، مريم سكتت شوية وكتبت له لا ميستاهلش بس القلب وما يريد. رامي قالها طب بصي أنا هقولك حاجة، انتي شكلك طيبة أوي وعلى نياتك، والواد ده شكله باعك عشان واحدة تانية، صح، مريم اتصدمت إنه عرف، قالها أصل كلهم كده، مريم لقت نفسها بتحكي له، بتحكي له عن فادي وعن قد ايه كان بيحبها في الأول وبعدين اتغير وبقى بيتهرب منها لحد ما قالها أنا مش قادر أكمل. رامي فضل يسمعها من غير ما يزهق، وبعدين قالها بصي يا مريم انتي محتاجة تنسيه خالص، انتي جميلة ودماغك حلوة وكلامك حلو حتى وانتي بتعيطي، مريم ضحكت وقالت له انت بتعاكس ولا ايه، قالها بعاكس طبعا، هو في حد تجيله رسالة حب طويلة عريضة كده وميعاكسش صاحبتها. من اليوم ده مريم بقت كل يوم تبعت لرامي، تصحى الصبح تبعت له صباح الخير، أنا رايحة الكلية، الدكتور طارق النهاردة هيعلقنا على المشاريع، ادعيلي، ورامي يرد ويقولها ربنا معاكي يا مريم وان شاء الله تعدي على خير، الدكتور ده شكله رخم أوي، مريم تقول له ده مش رخم بس ده عقدة حياتي، بيدينا أبحاث قد كده وبيسقط نص الدفعة كل سنة، كل البنات بتكرهه. رامي بقى يضحك ويقولها يا ساتر كل ده، ده شكله مفتري، مريم تقول له أيوة مفتري وظالم ومغرور، وكل يوم تحكي له عن يومها، تحكي له عن صاحبتها إيمان اللي بتحب واحد ومش قادرة تقوله، وعن حبيبة اللي على طول بتتخانق مع خطيبها، وعن مامتها اللي عايزاها تتجوز ابن خالتها، وعن باباها اللي تعبان، وعن كل حاجة. رامي كان بيسمعها وعمري ما حسسها إنه زهق، بالعكس كان بيرد بكلام يطمنها، مرة قالت له أنا حاسة إني فاشلة ومش هنجح، قالها انتي مش فاشلة انتي بس مضغوطة، وكل الضغط ده هيعدي وهتبقي أحسن واحدة، مرة تانية كانت بتعيط عشان مشروعها اترفض، قالها طب ما تعملي واحد أحسن منه ووريه إنك تقدري، وكان بيبعت لها ميمز يضحكها. مريم بقت متعلقة بيه أوي، بقت تستنى رسايله كل يوم، لو اتأخر خمس دقايق تقلق وتقول هو راح فين، هو زعل مني ولا ايه، وبقت تحس بفرحة غريبة لما اسمه يظهر على الموبايل، حست إنها وقعت في حبه من غير ما تشوفه حتى، هي حتى متعرفش شكله ولا سنه ولا بيشتغل ايه، كل اللي تعرفه إن اسمه رامي وصوته حلو من فويس نوت واحد بعته لها بالغلط وهو بيضحك. في يوم إيمان صاحبتها قالت لها يا مريم انتي اتغيرتي أوي، بقيتي بتضحكي على طول وماسكة الموبايل أربعة وعشرين ساعة، في ايه، مريم قالت لها هحكيلك بس متضحكيش عليا، وحكت لها قصة رامي من أول الرسالة الغلط لحد النهاردة، إيمان شهقت وقالت لها يا مجنونة انتي بتحبي واحد عمرك ما شفتيه، افرضي طلع عيل صغير، افرضي طلع متجوز، مريم قالت لها لا مش متجوز أنا سألته، قالها لا مش متجوز، إيمان قالت لها وافرضي طلع شكله وحش، مريم قالت لها مش مهم الشكل المهم قلبه. مريم قالت لها لا مش وهم أنا حاسة إن رامي ده حد كويس أوي وبيفهمني من غير ما أتكلم، ده أول حد يسمعني للآخر من غير ما يقاطعني، حبيبة كمان لما عرفت قالت لها نفس الكلام، قالت لها يا مريم لازم تشوفيه، اطلبي منه تقابليه، مريم كانت خايفة، خايفة تطلبه يقابلها فيرفض أو يطلع مش زي ما هي متخيلة. فضلت أسبوع بتفكر لحد ما في يوم رامي بعت لها قالها مالك مش بتتكلمي كتير النهاردة ليه، مريم قالت له بصراحة أنا عايزة أقولك حاجة، أنا حاسة إني بحبك، أنا عارفة إن ده جنان عشان احنا عمرنا ما اتقابلنا بس أنا بجد بحب كلامك معايا وبحب اهتمامك بيا، أنا أول مرة أحس إن حد مهتم بيا بجد بعد فادي. رامي سكت شوية مردش، مريم قلبها وقع في رجلها وحست إنها اتسرعت، فضلت تقول يا ريتني ما قلت، وبعد عشر دقايق رامي رد وقالها وأنا كمان يا مريم، أنا كمان بحبك، أنا من أول رسالة وانا حاسس إنك مختلفة، حاسس إنك طيبة وجدعة وقلبك أبيض، وأنا بصراحة كنت مستني اللحظة دي من زمان. مريم طارت من الفرحة وفضلت تتنطط في أوضتها، وبعتت لحبيبة وإيمان اسكرين وقالت لهم شفتوا قال ايه، حبيبة قالت لها طب هتقابليه امتى، مريم قالت لها هسأله. تاني يوم مريم قالت لرامي ما تيجي نتقابل، أنا نفسي أشوفك أوي، رامي قالها بصراحة أنا كمان نفسي أشوفك أوي بس الفترة دي مضغوط جدا في الشغل، اديني أسبوع بس أخلص اللي ورايا ونتقابل على طول، مريم قالت له ماشي هستناك. عدى الأسبوع ومريم كل يوم بتعد الأيام، لحد ما جه يوم الخميس رامي قالها أنا خلاص فضيت بكرة الجمعة نتقابل في كافيه في وسط البلد الساعة خمسة، مريم وافقت وكانت طايرة من الفرحة، راحت اشترت لبس جديد وعملت شعرها وحضرت هتتكلم في ايه. يوم الجمعة الصبح صحيت من بدري ولبست أحلى لبس عندها وحطت برفان وراحت الكافيه قبل الميعاد بنص ساعة، كانت قاعدة متوترة أوي وبتفرك في ايديها، وكل شوية تبص على الباب، الساعة بقت خمسة وخمسة مفيش حد جه، خمسة وعشرة برضه مفيش، بعتت له رسالة قالت له انت فين أنا مستنياك، مردش، بعتت تاني انت اتأخرت ليه، برضه مردش. فضلت قاعدة لحد الساعة ستة وبدأت تعيط، حست إنها اتضحك عليها تاني زي ما فادي ضحك عليها، قامت لمت حاجتها وماشية وهي بتعيط، وفجأة تليفونها رن، كان رامي، ردت عليه وهي بتعيط وبتقول له انت فين يا رامي أنا بقالي ساعة مستنياك، رامي قالها أنا آسف يا مريم والله حصلت حاجة غصب عني في الشغل ومعرفتش آجي، أنا آسف بجد، مريم قالت له انت بتضحك عليا صح، زي فادي، رامي قالها والله أبدا أنا عمري ما أضحك عليكي، أوعدك هعوضك قريب. مريم روحت بيتها وهي مقهورة ومش طايقة حد، وقررت متردش عليه تاني، فعلا رامي بعت لها كتير وهي مردتش، لحد ما في يوم إيمان قالت لها يا مريم عشان خاطري ردي عليه واسمعي عذره، يمكن فعلا حصله حاجة، مريم بعد إلحاح ردت وقالت له خلاص آخر فرصة، نتقابل بكرة في الجامعة، تعالالي عند كافيتيريا تجارة الساعة اتناشر، رامي قالها موافق. تاني يوم مريم راحت الجامعة وكانت لابسة نضارة شمس عشان تداري عينيها المنفوخة، راحت الكافيتيريا وقعدت تستناه، وفجأة لقت كل الطلبة بتجري وبتقول الدكتور طارق وصل الدكتور طارق وصل، مريم اتخضت وقالت ايه اللي جابه بدري كده، وفجأة لقت واحد طويل لابس بدلة وشكله شيك داخل الكافيتيريا والطلبة كلها بتبص له، مريم بصت كويس لقت إنه الدكتور طارق. اتصدمت لما لقت الدكتور طارق جاي ناحيتها وبيبصلها وبيضحك، قالها ايه يا مريم مستنياني من بدري، مريم فتحت بوقها ومش قادرة تتكلم، قالت له نعم يا دكتور، قالها ايه يا دكتور دي، مش انتي اللي قايلالي تعالي عند كافيتيريا تجارة الساعة اتناشر، أنا رامي يا مريم. مريم حست إن الأرض بتلف بيها، الدكتور طارق هو رامي، الدكتور اللي بتكرهه وبتشتمه كل يوم في الرسايل هو نفسه اللي حبته، فضلت متنحة ومش عارفة تقول ايه، الدكتور طارق قعد قدامها وقالها أنا عارف إنك مصدومة، وأنا كمان اتصدمت أول ما عرفت إن انتي مريم اللي في اللجنة، أنا كنت عارف من صوتك في الفويس نوت، بس مرضتش أقولك عشان كنت خايف تهربي. مريم قالت له انت كنت عارف وسايبني أشتمك كل يوم، ده أنا قلت عليك مفتري وظالم ومغرور، طارق ضحك وقالها أيوة سمعت كل ده واستاهل، أنا عارف إني شديد في الكلية بس ده عشان عايزكم تبقوا أحسن ناس، بس عمري ما كنت مفتري، مريم قالت له وانت ازاي ترضى تخليني أحبك وانت دكتوري، ده غلط، طارق قالها الحب مفيهوش صح وغلط يا مريم، أنا محبتش طالبة عندي، أنا حبيت بنت طيبة بعتت رسالة بالغلط وفضلت تحكيلي عن وجعها، أنا حبيت مريم مش طالبة عندي. مريم قامت تجري من قدامه وهي بتعيط، طارق نادى عليها بس هي مراحتش، روحت بيتها وقفلت على نفسها تلات أيام مش بترد على حد لا رامي ولا حبيبة ولا إيمان، كانت حاسة إنها ملخبطة أوي، بتحب رامي اللي كان حنين عليها وبتكره الدكتور طارق اللي كان قاسي عليها، ازاي يبقوا نفس الشخص. في اليوم الرابع إيمان وحبيبة جم لها البيت وقعدوا يقولوا لها يا بنتي الدكتور طارق ده شاب صغير ولسه متعين جديد وعنده تلاتين سنة بس، وهو مش وحش زي ما انتي فاكرة، ده كل الدفعة بتحترمه عشان شاطر، ومش ذنبه إنك بعتتي الرسالة غلط، مريم قالت لهم بس ازاي هبص في وشه في المحاضرة بعد كده، حبيبة قالت لها الحب مش عيب يا مريم، وبعدين انتي خلاص قربتي تتخرجي ومش هيبقى دكتورك، مريم فكرت في كلامهم طول الليل، وفتحت الشات بينها وبين رامي وقعدت تقرا كل الرسايل من أول يوم، قد ايه كان بيطمنها وبيضحكها وبيسمعها، حست إنها مفتقداه أوي. تاني يوم راحت الجامعة ودخلت محاضرة الدكتور طارق وهي مكسوفة أوي، طول المحاضرة هو بيبصلها وهي بتبص في الأرض، بعد المحاضرة نادى عليها وقالها مريم ممكن دقيقة، مريم راحت له وهي مرعوبة، قالها أنا آسف لو سببتلك أي إحراج، أنا عمري ما قصدت أخبي عليكي، بس كنت خايف أخسرك، أنا فعلا بحبك ومش قادر أنساكي، ولو عايزاني أبعد عنك هبعد بس عشان خاطري متزعليش مني. مريم بصت له وعنيها فيها دموع وقالت له أنا مش زعلانة منك أنا زعلانة من نفسي، أنا كنت غبية لما شتمتك وانت كنت بتسمعني، طارق قالها انتي مش غبية انتي أطيب واحدة شفتها في حياتي، مريم ضحكت وقالت له طب هتسامحني على كلمة مفتري، قالها هسامحك لو وافقتي تخرجي معايا النهاردة بجد مش هتأخر، مريم ضحكت وقالت له موافقة بس المرة دي لو اتأخرت همشي، طارق قالها لا مش هتأخر. وبالفعل اتقابلوا بالليل وقعدوا يتكلموا كتير وضحكوا كتير، ومريم اكتشفت إن طارق مش نكدي زي ما كانت فاكرة، ده دمه خفيف وبيحب الهزار وبيحب شغله، ومن يومها بقوا بيخرجوا سوا وطارق بقى يساعدها في المذاكرة والمشروع، ومريم بقت أشطر واحدة في الدفعة، وفي آخر السنة اتخرجت بتقدير امتياز، وطارق استناها لحد ما اتخرجت وبعدين راح خطبها من أهلها، وأهلها وافقوا لما عرفوا إنه دكتور محترم وبيحبها، وعملوا خطوبة كبيرة حضرها كل صحابها إيمان وحبيبة وفادي اللي جه يبارك لها ومشي، وعاشت مريم مع رامي اللي هو طارق أحلى أيام حياتها وعرفت إن الرسالة الغلط كانت أحلى غلطة في حياتها.