ل مروه حمدى
بصوت حزين ضعيف: ماهو ممكن يكون لسه بيحبها ومن كتر حبه مش قادر يسامحها على وجع قلبه ال اتسبب فيه.
وبلجلجله :_طب وانا؟ وحبى و ال حاولت اعمله علشان ابينله قد ايه هو مهم فى حياتى، معقول مخدش لباله؟!
تضرب على راسها تنعت نفسها بالغبية: انتى نسيتى انك قايلاله ان فى حد فى حياتك!
على صوتها باستفهام:_طب هو مفهمش انه هو! ما فهمش المكتوب على دبلته حتى؟!
حركت يدها بالهواء بنفاذ صبر:_كان فهمها وقتها عند الجوهرجى لما سأل او حتى كان دور على معناها وقالك، بس الواضح انه مش فى دماغه.
بأعين اختفت منها اللمعه وبنظرات تائهة:_يعنى ايه؟ ده بكرة كتب الكتاب بالطريقة دى هتجوز واحد بيحب أختى.
_وهتعملى ايه انتى ال وافقتى تدخلى اللعبة من اولها .
_كان عندى امل يحس بيا وخصوصا ان ولاء مش عايزاه، بس كده مهما اعمل مش شايفني .
_مش مشكلة الوقت بينسى بكرة ينسى واختك مصيرها تتجوز وتبعد كملى واصبرى.
وقفت من مجلسها: لا مش هقدر أكمل كده، مش هستحمل النار دى، انا كل ما بشوفها فى مكان هو فيه عنيا بتكون عليه بخاف نظرة وحده غلط منه تيجى عليها هعيش ال جاى من عمرى ازاى! هنام ازاى جنبه على مخدة واحده وتفكيرى انه دلوقت بيفكر فى وحده تانية وحده تانية ال هى أختى.
أمسكت خصلات شعرها بيدها تمرر على وجنتها بتوتر: انا ايه ال عملته فى نفسى ده! اعمل ايه ؟ مش هقدر مش هقدر الفترة ال فاتت كنت عايزاه يشوفني يقرب منى بس انا ال وقعت فيه اكتر واكتر فى الاول كنت اقدر اشوفه جنب أختى فى كوشة وحده دلوقت كل ما بجمعهم سوا فى جملة وحده قلبى بيتقطع.
جلست على الفراش ودمعه حارقة هبطت على وجنتها تبتلع ريقها تهز رأسها باستسلام: المرة دى انا هخلى القرار بايده هو، هساله بصراحه وهو ملزم يجاوب ومشاعرى ليا لو حس بيها هتخرج ليه محسش يبقى كل واحد من طريق وادعى ربنا يشيله من جوايا.
أمسكت هاتفها تخرج رقمه، اغمضت عينيها برجاء: يارب.
فتحتها من جديد تضغط على زر الاتصال بنفس الوقت وهو يقم بطلب رقمها، لياتى لها الخط مشغول.
زفرت بصوت عالى: يووه، مشغول!
مرت ثانيه لتتسع عيناها: مع مين ابن خديجه؟
لتقم بالأتصال مرة أخرى يأتى لها الخط مشغول مرة ثالثه تقرض اظافرها بقلة صبر: رن رن .
لياتى لها الخط مشغول.
نظرت للهاتف وبصوت باكى: بيرن على حد ولا انشالله مافيش شبكة ومسقطه.
