ياسمين كانت بنت بسيطه

ياسمين روحت البيت وهي طايرة من الفرح وفي نفس الوقت حاسة بذنب فظيع مش قادرة تنام كانت حاسة انها بتحب انس بجد بتحبه من قلبها مش تمثيل ولا خداع وقررت انها لازم تقول له الحقيقة مهما حصل تاني يوم كلمت هدير وقالت لها يا هدير انا مش هكمل في الخطة دي انا بحب انس بجد ومش هقدر اخدعه اكتر من كده هدير اتجننت عليها وقالت لها انتي هبلة يا ياسمين حد يلاقي فرخة بتبيض دهب ويقول لا ده غني وهيخليكي تعيشي ملكة انتي هتضيعي الفرصة عشان شوية مشاعر فارغة ياسمين قالت لها دي مش مشاعر فارغة انا بحبه ولو بيحبني بجد هيسامحني هدير قالت لها براحتك بس متجيش تعيطيلي بعدين

ياسمين قررت تروح لانس وتعترف له بكل حاجة كانت كاتبة كلام كتير في ورقة وعمالة تحفظ هتقول ايه لبست فستان بسيط وراحت على شركته السكرتيرة دخلتها اول ما انس شافها قام حضنها وقال لها ايه المفاجأة الحلوة دي ياسمين قالت له انس انا عايزة اتكلم معاك في موضوع مهم اوي انس قال لها طب نقعد في المكتب اللي جوه قعدوا وياسمين بدأت تتكلم وعنيها مليانة دموع يا انس انا لازم اقولك الحقيقة انا في الاول مكنتش اعرفك وكنت جاية ليك لسبب مش كويس صاحبتي هي اللي قالت لي اعمل كده عشان انت غني وانا كنت محتاجة فلوس عشان امي وكده بس والله العظيم انا من اول يوم عرفتك فيه وانا حبيتك بجد وكل كلمة قولتهالك بعد كده كانت من قلبي

قبل ما تكمل كلامها باب المكتب اتفتح ودخلت هدير ومعاها واحدة تانية اسمها زينة زينة دي كانت تعرف انس من قبل كده وكانت غيرانة من ياسمين هدير اول ما شافت ياسمين قالت ببرود ايه يا ياسمين بتعترفي ولا ايه ما خلاص اللي حصل حصل انس بص لهدير وقال لها انتي تعرفيها هدير ضحكت وقالت له اعرفها دي صاحبتي الانتيم وانا اللي بعتها ليك يا انس باشا انا اللي قولتلها تروح توقعك وتخليك تحبها عشان تاخد فلوسك هي كانت محتاجة وانا ساعدتها اصلها غلبانة اوي وامها تعبانة قلنا نلعب لعبة صغيرة على الراجل الغني اللي مش لاقي حد يحبه البنت دي كانت بتمثل عليك كل ده تمثيل

ياسمين اتجمدت مكانها ومش مصدقة ان هدير صاحبة عمرها بتعمل فيها كده قالت لها يا هدير ليه كده ليه بتعملي كده انا قولتلك انا بحبه هدير قالت لها وانا مالي يا حبيبتي هو انتي فاكرة اني هسيبك تضحكي عليا وتاخديه لوحدك ما انتي من ساعة ما عرفتيه وانتي نسيتيني وبطلتي تحكيلي ما انا لازم ابوظلك اللعبة زي ما بوظتي خطتي انس كان واقف مصدوم ووشه احمر من الغضب بص لياسمين وقال لها الكلام ده صح انتي كنتي جاية لي عشان فلوسي ياسمين بتعيط وبتقول له يا انس اسمعني انا اه في الاول كنت كده بس والله حبيتك بجد انس قال لها بجد هو ده الحب في نظرك انك تخدعيني وتمثلي عليا كل الفترة دي انا قولتلك انا اتخدعت كتير قبل كده من بنات بتبص لفلوسي وانتي كنتي اخر واحدة اتوقع منها كده اطلعي بره يا ياسمين مش عايز اشوفك تاني